صوت الأنين
رغم القساوة
وقلة حيلتي فيكي
بحنلك اصل التراب غالي
وبعيني شوفت التراب
اكل الفقير تحت الكباري
فالبرد بيلالي
وكسوفي منك يابلد
يمنعني اقول انا بكرهك
انتي اللي باقيالي
احداث بتخطر بالخيال
اهمال في طب وهندسة
وسور العلام عالي
تمن العلاج
في طابور المحرومين
دمع العيون
والوصف في تسالي
قول ياوطن
فين الحنان فين الامان
وجواعة جوفهم م الطعام خالي
انا حبي ليك فاق الحدود
حتى اللي راح يحمي الحدود
ومقالش وانا مالي
مرجعش بيته وراح هدر
وابوه من الدمع انفطر
صوت الانين عايش في موالي
وبقول يا نيل العطشانين
اسقينا يوم فرح وسعادة
مصعبش عليك حالهم ولا حالي
واللي نام من غير غطى
واللي غرقان في الزقططة
سيان
ومري ياليالي
انا نفسي تكوني في السما
والكل في حضنك يترمى
والنعمة تبان على عيالي
